Sloka Text in Telugu , Kannada, Gujarati, Devanagari, English

हरिः ओम्

|| ಓಮ್ ತತ್ ಸತ್||
ಸುಂದರಕಾಂಡ.
ಅಥ ಸಪ್ತವಿಂಶಸ್ಸರ್ಗಃ

ಇತ್ಯುಕ್ತಾಃ ಸೀತಯಾ ಘೋರಾ ರಾಕ್ಷಸ್ಯಃ ಕ್ರೋಧಮೂರ್ಛಿತಾಃ|
ಕಾಶ್ಚಿತ್ ಜಗ್ಮುಃ ತದಾಖ್ಯಾತುಂ ರಾವಣಸ್ಯ ತರಸ್ವಿನಃ||1||

ತತಸ್ಸೀತಾ ಮುಪಾಗಮ್ಯ ರಾಕ್ಷಸ್ಯೋ ಘೋರದರ್ಶನಾಃ|
ಪುನಃ ಪರುಷಮೇಕಾರ್ಥಂ ಅನರ್ಥಾರ್ಥಮ್ ಅಥಾಬ್ರುವನ್||2||

ಅದ್ಯೇದಾನೀಂ ತವಾನಾರ್ಯೇ ಸೀತೇ ಪಾಪವಿನಿಶ್ಚಯೇ|
ರಾಕ್ಷಸ್ಯೋ ಭಕ್ಷಯಿಷ್ಯಂತಿ ಮಾಂಸ ಮೇತತ್ ಯಥಾಸುಖಮ್||3||

ಸೀತಾಂ ತಾಭಿ ರನಾರ್ಯಾಭಿಃ ದೃಷ್ಟ್ವಾ ಸಂತರ್ಜಿತಾಂ ತದಾ|
ರಾಕ್ಷಸೀ ತ್ರಿಜಟಾ ವೃದ್ಧಾ ಶಯಾನಾ ವಾಕ್ಯಮಬ್ರವೀತ್ ||4||

ಆತ್ಮಾನಂ ಖಾದತಾ ನಾರ್ಯಾ ನ ಸೀತಾಂ ಭಕ್ಷಯಿಷ್ಯಥ|
ಜನಕಸ್ಯ ಸುತಾ ಮಿಷ್ಟಾಂ ಸ್ನುಷಾಂ ದಶರಥಸ್ಯ ಚ||5||

ಸ್ವಪ್ನೋ ಹೃದ್ಯ ಮಯಾ ದೃಷ್ಟೋ ದಾರುಣೋ ರೋಮಹರ್ಷಣಃ|
ರಾಕ್ಷಸಾನಾಂ ಅಭಾವಾಯ ಭರ್ತುರಸ್ಯಾ ಜಯಾಯ ಚ||6||

ಏವಮುಕ್ತಾ ತ್ರಿಜಟಾಯಾ ರಾಕ್ಷಸ್ಯಃ ಕ್ರೋಧಮೂರ್ಛಿತಾಃ|
ಸರ್ವಾ ಏವಾಬ್ರುವನ್ ಭೀತಾಃ ತ್ರಿಜಟಾಂ ತಾಂ ಇದಂ ವಚಃ||7||

ಕಥಯಸ್ವ ತ್ವಯಾ ದೃಷ್ಟಃ ಸ್ವಪ್ನೋऽಯಂ ಕೀದೃಶೋ ನಿಶಿ|
ತಾಸಾಂ ಶ್ರುತ್ವಾತು ವಚನಂ ರಾಕ್ಷಸೀನಾಂ ಮುಖಾಚ್ಚ್ಯುತಮ್||8||

ಉವಾಚ ವಚನಂ ಕಾಲೇ ತ್ರಿಜಟಾ ಸ್ವಪ್ನ ಸಂಸ್ಥಿತಮ್|
ಗಜದಂತಮಯೀಂ ದಿವ್ಯಾಂ ಶಿಬಿಕಾಮಂತರಿಕ್ಷಗಾಮ್||9||

ಯುಕ್ತಾಂ ಹಂಸ ಸಹಸ್ರೇಣ ಸ್ವಯಮಾಸ್ಥಾಯ ರಾಘವಃ|
ಶುಕ್ಲಮಾಲ್ಯಾಂಬರಧರೋ ಲಕ್ಷ್ಮಣೇನ ಸಹಾಗತಃ||10||

ಸ್ವಪ್ನೇ ಚಾದ್ಯ ಮಯಾ ದೃಷ್ಟಾ ಸೀತಾ ಶುಕ್ಲಾಂಬರಾವೃತಾ|
ಸಾಗರೇಣ ಪರಿಕ್ಷಿಪ್ತಂ ಶ್ವೇತಂ ಪರ್ವತ ಮಾಸ್ಥಿತಾ||11||

ರಾಮೇಣ ಸಂಗತಾ ಸೀತಾ ಭಾಸ್ಕರೇಣ ಪ್ರಭಾ ಯಥಾ|
ರಾಘವಶ್ಚ ಮಯಾ ದೃಷ್ಟ ಶ್ಚತುರ್ದಂತಂ ಮಹಾಗಜಮ್||12||

ಆರೂಢಃ ಶೈಲಸಂಕಾಶಂ ಚಚಾರ ಸಹ ಲಕ್ಷ್ಮಣಃ|
ತತಸ್ತೌ ನರಶಾರ್ದೂಲೌ ದೀಪ್ಯಮಾನೌ ಸ್ವತೇಜಸಾ||13||

ಶುಕ್ಲಮಾಲ್ಯಾಂಬರಧರೌ ಜಾನಕೀಂ ಪರ್ಯುಪಸ್ಥಿತೌ|
ತತಸ್ತಸ್ಯ ಸ್ಯಾಗ್ರೇ ಹ್ಯಾಕಾಶ ಸ್ಥಸ್ಯ ದಂತಿನಃ||14||

ಭರ್ತ್ರಾ ಪರಿಗೃಹೀತಸ್ಯ ಜಾನಕೀ ಸ್ಕಂಧಮಾಶ್ರಿತಾ|
ಭರ್ತುರಂಕಾತ್ ಸಮುತ್ಪತ್ಯ ತತಃ ಕಮಲಲೋಚನಾ||15||

ಚಂದ್ರಸೂರ್ಯೌ ಮಯಾ ದೃಷ್ಟಾ ಪಾಣಿಭ್ಯಾಂ ಪರಿಮಾರ್ಜತೀ|
ತತಸ್ತಾಭ್ಯಾಂ ಕುಮಾರಾಭ್ಯಾ ಮಾಸ್ಥಿತಃ ಸ ಗಜೋತ್ತಮಃ||16||

ಸೀತಯಾ ಚ ವಿಶಾಲಾಕ್ಷ್ಯಾ ಲಂಕಾಯಾ ಉಪರಿಸ್ಥಿತಃ|
ಪಾಣ್ಡುರರ್ಷಭ ಯುಕ್ತೇನ ರಥೇ ನಾಷ್ಟಯುಜಾ ಸ್ವಯಮ್|| 17||

ಇಹೋಪಯಾತಃ ಕಾಕು‍ತ್ ಸ್ಥಃ ಸೀತಯಾ ಸಹ ಭಾರ್ಯಯಾ|
ಲಕ್ಷ್ಮಣೇನ ಸಹಭ್ರಾತ್ರಾ ಸೀತಯಾ ಸಹ ವೀರ್ಯವಾನ್ ||18||

ಆರುಹ್ಯ ಪುಷ್ಪಕಂ ದಿವ್ಯಂ ವಿಮಾನಂ ಸೂರ್ಯಸನ್ನಿಭಮ್|
ಉತ್ತರಾಂ ದಿಶಮಾಲೋಕ್ಯ ಜಗಾಮ ಪುರುಷೋತ್ತಮಃ||19||

ಏವಂ ಸ್ವಪ್ನೇ ಮಯಾ ದೃಷ್ಟೋ ರಾಮೋ ವಿಷ್ಣುಪರಾಕ್ರಮಃ|
ಲಕ್ಷ್ಮಣೇನ ಸಹಭ್ರಾತ್ರಾ ಸೀತಾಯ ಸಹ ಭಾರ್ಯಯಾ||20||

ನ ಹಿ ರಾಮೋ ಮಹಾತೇಜಾ ಶ್ಶಕ್ಯೋ ಜೇತುಂ ಸುರಾಸುರೈಃ|
ರಾಕ್ಷಸೈರ್ವಾಪಿ ಚಾನ್ಯೈರ್ವಾ ಸ್ವರ್ಗಂ ಪಾಪಜನೈರಿವ||21||

ರಾವಣಶ್ಚ ಮಯಾದೃಷ್ಟಃ ಕ್ಷಿತೌ ತೈಲಸಮುತ್‍ಕ್ಷಿತಃ |
ರಕ್ತವಾಸಾಃ ಪಿಬನ್ಮತ್ತಃ ಕರವೀರಕೃತ ಸ್ರಜಃ||22||

ವಿಮಾನಾತ್ ಪುಷ್ಪಕಾದದ್ಯ ರಾವಣಃ ಪತಿತೋ ಭುವಿ|
ಕೃಷ್ಯಮಾಣ ಸ್ತ್ರಿಯಾ ದೃಷ್ಟೋ ಮುಂಡಃ ಕೃಷ್ಣಾಂಬರಃ ಪುನಃ||23||

ರಥೇನ ಖರಯುಕ್ತೇನ ರಕ್ತಮಾಲ್ಯಾನುಲೇಪನಃ|
ಪಿಬಂ ಸ್ತೈಲಂ ಹಸನ್ ನೃತ್ಯನ್ ಭ್ರಾಂತಚಿತ್ತಕುಲೇಂದ್ರಿಯಃ||24||

ಗರ್ಧಭೇನ ಯಯೌ ಶೀಘ್ರಂ ದಕ್ಷಿಣಾಂ ದಿಶಮಾಸ್ಥಿತಃ|
ಪುನರೇವ ಮಯಾದೃಷ್ಟೋ ರಾವಣೋ ರಾಕ್ಷಸೇಶ್ವರಃ||25||

ಪತಿತೋऽವಾಕ್ಛಿರಾ ಭೂಮೌ ಗರ್ಧಭಾತ್ ಭಯಮೋಹಿತಃ|
ಸಹಸೋತ್ಥಾಯ ಸಂಭ್ರಾಂತೋ ಭಯಾರ್ತೋ ಮದವಿಹ್ವಲಃ||26||

ಉನ್ಮತ್ತ ಇವ ದಿಗ್ವಾಸಾದುರ್ವಾಕ್ಯಂ ಪ್ರಲಪನ್ ಬಹು|
ದುರ್ಗಂಧಂ ದುಸ್ಸಹಂ ಘೋರಂ ತಿಮಿರಂ ನರಕೋಪಮಮ್||27||

ಮಲಪಂಕಂ ಪ್ರವಿಶ್ಯಾಶು ಮಗ್ನಸ್ತತ್ರ ಸ ರಾವಣಃ|
ಕಂಠೇ ಬಧ್ವಾ ದಶಗ್ರೀವಂ ಪ್ರಮದಾ ರಕ್ತವಾಸಿನೀ||28||

ಕಾಲೀ ಕರ್ದಮಲಿಪ್ತಾಂಗೀ ದಿಶಂ ಯಾಮ್ಯಾಂ ಪ್ರಕರ್ಷತಿ|
ಏವಂ ತತ್ರ ಮಯಾದೃಷ್ಟಃ ಕುಂಭಕರ್ಣೋ ನಿಶಾಚರಃ||29||

ರಾವಣಸ್ಯ ಸುತಾಸ್ಸರ್ವೇ ದೃಷ್ಟಾ ಸ್ತೈಲಸಮುತ್‍ಕ್ಷಿತಾಃ|
ವರಾಹೇಣ ದಶಗ್ರೀವ ಶ್ಶಿಂಶುಮಾರೇಣ ಚ ಇಂದ್ರಜಿತ್||30||

ಉಷ್ಟ್ರೇಣ ಕುಂಭಕರ್ಣಶ್ಚ ಪ್ರಯಾತೋ ದಕ್ಷಿಣಾಂ ದಿಶಮ್|
ಏಕಸ್ತತ್ರ ಮಯಾ ದೃಷ್ಟಾ ಶ್ಶ್ವೇತಚ್ಛತ್ರೋ ವಿಭೀಷಣಃ||31||

ಶುಕ್ಲಮಾಲ್ಯಾಂಬರಧರಃ ಶುಕ್ಲಗಂಧಾನುಲೇಪನಃ|
ಶಂಖದುಂದುಭಿನಿರ್ಘೋಷೈಃ ನೃತ್ತಗೀತೈರಲಂಕೃತಃ||32||

ಆರುಹ್ಯ ಶೈಲಸಂಕಾಶಂ ಮೇಘಸ್ತನಿತನಿಸ್ಸ್ವನಮ್|
ಚತುರ್ದಂತಂ ಗಜಂ ದಿವ್ಯಮಾಸ್ತೇ ತತ್ರ ವಿಭೀಷಣಃ||33||

ಚತುರ್ಭಿಃ ಸಚಿವೈಃ ಸಾರ್ಥಂ ವೈಹಾಯಸ ಮುಪಸ್ಥಿತಃ|
ಸಮಾಜಶ್ಚ ಮಯಾ ದೃಷ್ಟೋ ಗೀತವಾದಿತ್ರ ನಿಸ್ಸ್ವನಃ||34||

ಪಿಬತಾಂ ರಕ್ತಮಾಲ್ಯಾನಾಂ ರಕ್ಷಸಾಂ ರಕ್ತವಾಸಸಾಮ್|
ಲಂಕಾಚೇಯಂ ಪುರೀ ರಮ್ಯಾ ಸವಾಜಿ ರಥಕುಂಜರಾ||35||

ಸಾಗರೇ ಪತಿತಾ ದೃಷ್ಟಾ ಭಗ್ನ ಗೋಪುರತೋರಣಾ|
ಲಂಕಾ ದೃಷ್ಟಾ ಮಯಾ ಸ್ವಪ್ನೇ ರಾವಣೇ ನಾಭಿರಕ್ಷಿತಾ||36||

ದಗ್ಧಾ ರಾಮಸ್ಯ ದೂತೇನ ವಾನರೇಣ ತರಸ್ವಿನಾ |
ಪೀತ್ವಾ ತೈಲಂ ಪ್ರವೃತ್ತಾಶ್ಚ ಪ್ರಹಸಂತ್ಯೋ ಮಹಾಸ್ವನಾಃ||37||

ಲಂಕಾಯಾಂ ಭಸ್ಮರೂಕ್ಷಾಯಾಂ ಪ್ರವಿಷ್ಟಾ ರಾಕ್ಷಸ ಸ್ತ್ರಿಯಃ|
ಕುಂಭಕರ್ಣಾದಯಶ್ಚೇಮೇ ಸರ್ವೇ ರಾಕ್ಷಸ ಪುಂಗವಃ||38||

ರಕ್ತಂ ನಿವಸನಂ ಗೃಹ್ಯ ಪ್ರವಿಷ್ಟಾ ಗೋಮಯಹ್ರದೇ|
ಅಪಗಚ್ಛತ ನಶ್ಯಧ್ವಂ ಸೀತಾ ಮಾಪ ಸ ರಾಘವಃ||39||

ಘಾತಯೇತ್ ಪರಮಾಮರ್ಷೀ ಸರ್ವೈ ಸ್ಸಾರ್ಥಂ ಹಿ ರಾಕ್ಷಸೈಃ|
ಪ್ರಿಯಾಂ ಬಹುಮತಾಂ ಭಾರ್ಯಾಂ ವನವಾಸ ಮನುವ್ರತಾಮ್||40||

ಭರ್ತ್ಸಿತಾಂ ತರ್ಜಿತಾಂ ವಾಪಿ ನಾನುಮಂಶ್ಯತಿ ರಾಘವಃ|
ತದಲಂ ಕ್ರೂರವಾಕ್ಯೈಃ ವಃ ಸಾಂತ್ವಮೇವಾಭಿದೀಯತಾಮ್||41||

ಅಭಿಯಾಚಾಮ ವೈದೇಹೀ ಮೇ ತದ್ಧಿ ಮಮರೋಚತೇ|
ಯಸ್ಯಾಂ ಏವಂ ವಿಧಃ ಸ್ವಪ್ನೋ ದುಃಖಿತಾಯಾಂ ಪ್ರದೃಶ್ಯತೇ||42||

ಸಾ ದುಃಖೈಃ ವಿವಿಧೈ ರ್ಮುಕ್ತಾ ಪ್ರಿಯಂ ಪ್ರಾಪ್ನೋತ್ಯನುತ್ತಮಮ್|
ಭರ್ತ್ಸಿತಾ ಮಪಿ ಯಾಚಧ್ವಂ ರಾಕ್ಷಸ್ಯಃ ಕಿಂ ವಿವಕ್ಷಯಾ||43||

ರಾಘವಾದ್ಧಿ ಭಯಂ ಘೋರಂ ರಾಕ್ಷಸಾನಾ ಮುಪಸ್ಥಿತಮ್|
ಪ್ರಣಿಪಾತಪ್ರಸನ್ನಾ ಹಿ ಮೈಥಿಲೀ ಜನಕಾತ್ಮಜಾ||44||

ಅಲಮೇಷಾ ಪರಿತ್ರಾತುಂ ರಾಕ್ಷಸ್ಯೋ ಮಹತೋ ಭಯಾತ್ |
ಅಪಿ ಚಾಸ್ಯಾ ವಿಶಾಲಾಕ್ಷ್ಯಾ ನ ಕಿಂಚಿ ದುಪಲಕ್ಷಯೇ||45||

ವಿರೂಪಮಪಿ ಚಾಂಗೇಷು ಸುಸೂಕ್ಷ್ಮಮಪಿ ಲಕ್ಷಣಮ್|
ಛಾಯಾವೈಗುಣ್ಯಮಾತ್ರಂ ತು ಶಂಕೇ ದುಃಖಮುಪಸ್ಥಿತಮ್||46||

ಅದುಃಖಾರ್ಹಾ ಮಿಮಾಂ ದೇವೀಂ ವೈಹಾಯಸ ಮುಪಸ್ಥಿತಮ್|
ಅರ್ಥಸಿದ್ಧಿಂ ತು ವೈದೇಹ್ಯಾಃ ಪಶ್ಯಾಮ್ಯಹ ಮುಪಸ್ಥಿತಾಮ್||47||

ರಾಕ್ಷಸೇಂದ್ರವಿನಾಶಂ ಚ ವಿಜಯಂ ರಾಘವಸ್ಯ ಚ|
ನಿಮಿತ್ತಭೂತ ಮೇತ ತ್ತು ಶ್ರೋತುಮಸ್ಯಾ ಮಹತ್ಪ್ರಿಯಮ್||48||

ದೃಶ್ಯತೇ ಚ ಸ್ಫುರಚ್ಛಕ್ಷುಃ ಪದ್ಮ ಪತ್ರ ಮಿವಾಯತಮ್|
ಈಷಚ್ಚ ಹೃಷಿತೋ ವಾಸ್ಯಾ ದಕ್ಷಿಣಾಯಾ ಹ್ಯದಕ್ಷಿಣಃ||49||

ಅಕಸ್ಮಾದೇವ ವೈದೇಹ್ಯಾ ಬಾಹುರೇಕಃ ಪ್ರಕಂಪತೇ|
ಕರೇಣು ಹಸ್ತ ಪ್ರತಿಮ ಸ್ಸವ್ಯ ಶ್ಚೋರು ರುನುತ್ತಮಃ||50||
ವೇಪಮಾನ ಸ್ಸೂಚಯತಿ ರಾಘವಂ ಪುರತಃ ಸ್ಥಿತಮ್||51||

ಪಕ್ಷೀ ಚ ಶಾಖಾ ನಿಲಯಃ ಪ್ರಹೃಷ್ಟಃ
ಪುನಃ ಪುನಶ್ಚೋತ್ತಮ ಸಾಂತ್ವವಾದೀ|
ಸುಸ್ವಾಗತಾಂ ವಾಚ ಮುದೀರಯಾನಃ
ಪುನಃ ಪುನಶ್ಚೋದಯತೀವ ಹೃಷ್ಟಃ||52||

ಇತ್ಯಾರ್ಷೇ ಶ್ರೀಮದ್ರಾಮಾಯಣೇ ಆದಿಕಾವ್ಯೇ ವಾಲ್ಮೀಕೀಯೇ
ಚತುರ್ವಿಂಶತ್ ಸಹಸ್ರಿಕಾಯಾಂ ಸಂಹಿತಾಯಾಮ್
ಶ್ರೀಮತ್ಸುಂದರಕಾಂಡೇ ಸಪ್ತವಿಂಶಸ್ಸರ್ಗಃ||

|| Om tat sat ||